Yfirlit búvélaprófana árið 1985
KRONE – heyhleðsluvagn
Skýrsla nr. 537
Gerð: Krone HSL 3502. Framleiðandi: Krone GmbH, Spelle V-Þýskalandi. Innflytjandi: Hamar h.f., Reykjavík.
YFIRLIT
Krone HSL 3502 heyhleðsluvagninn var prófaður af Bútæknideild Rannsóknastofnunar landbúnaðarins sumarið 1984 og notaður alls 150 klst.
Vagninn er ætlaður til flutninga á heyi og grænfóðri. Sópvindan vísar aftur og er lyft með vökvaátaki frá traktor. Hleðslubúnaðurinn vann vel. Hleðslutími við þurrheyshirðingu var að jafnaði 5,5 mín/tonn og við vothey um 2,3 mín/tonn. Hlassþungi var að jafnaði 3 tonn af votheyi og 1,8 tonn af þurrheyi. Hægt er að hafa allt að 41 hníf í einni röð í hleðslustokk vagnsins og er þá bil á milli þeirra 25 mm. Sé öllum hnífunum beitt verður söxun heysins mikil og er það ótvíræður kostur við votheysgerð. Losun vagnsins tekur minnst 2,5-3,0 mín auk þess sem nokkurn tíma tekur að opna og loka afturgrind. Ætla verður minnst 40 kW dráttarvél fyrir vagninn eigi að nýta hann til fulls. Á reynslutímanum brotnaði festing á hnífaöryggi. Annars reyndist vagninn traustbyggður og meiri háttar bilanir urðu ekki.
KRONE – rúllubindivél
Skýrsla nr. 538
Gerð: Krone KR 120. Framleiðandi: Krone GmbH, Spelle V-Þýskalandi. Innflytjandi: Hamar hf, Reykjavík.
YFIRLIT
Rúllubindivélin Krone KR 120 var reynd af Bútæknideild Rannsóknastofnunar landbúnaðarins sumarið 1984. Með henni voru bundnir alls um 1030 baggar.
Rúllubindivélin tekur grænfóður og hey á öllum þurrkstigum upp úr sláttuskárum eða múgum. Hún vefur fóðrið saman í þétta sívalningslaga rúllubagga. Baggarnir eru 1,2 m að breidd og 1,2 m í þvermál. Þyngd þeirra var að jafnaði 500-600 kg, sem samsvarar 370-440 kg/m3, og er þá miðað við nokkuð forþurrkað hey (rakastig 60-70%). Garnnotkun reyndist vera á bilinu 50-80 m garns á bagga, mismunandi eftir þéttleika vafninga. Afköst við bindingu voru að jafnaði 15-20 baggar/klst, sem samsvarar 9-10 tonn/klst. (Rakastig heys 60-70%). Bindivélin er lipur í notkun. Binding gekk að jafnaði snurðulaust og baggarnir voru yfirleitt vel lagaðir. Í lok reynslutímans bognaði þverband í keðjubelti vélarinnar við bindingu grænfóðurs (fóðurkál). Aðrar bilanir urðu ekki á reynslutímanum.
CLAAS – rúllubindivél
Skýrsla nr. 539
Gerð: Claas Rollant 44. Framleiðandi: Claas OHG V-Þýskalandi. Innflytjandi: Búnaðardeild SÍS, Reykjavík.
YFIRLIT
Rúllubindivélin Claas Rollant 44 var reynd af Bútæknideild Rannsóknastofnunar landbúnaðarins sumrin 1983 og 1984. Með henni voru bundnir alls um 2050 baggar.
Rúllubindivélin tekur hey og grænfóður á öllum þurrkstigum upp úr sláttuskárum eða múgum. Hún vindur fóðrið saman í þétta sívalningslaga rúllubagga. Baggarnir eru 1,22 m að breidd og 1,2 m í þvermál. Þyngd þeirra var að jafnaði 550-650 kg, sem samsvarar 400-470 kg/m3, og er þá miðað við nokkuð furþurrkað hey (rakastig 60-70%). Garnnotkun reyndist vera á bilinu 23-37 m garns á bagga, mismunandi eftir þéttleika vafninga. Afköst við bindingu voru að jafnaði 12-16 baggar/klst, sem samsvarar 7,5-9,5 tonn/klst (rakastig í heyi 60-70%). Bindivélin er lipur í notkun, binding gekk að jafnaði snurðulaust og baggarnir voru yfirleitt vel lagaðir. Engar bilanir urðu á reynslutímanum.
NEW HOLLAND - rúllubindivél
Skýrsla nr. 540
Gerð: New Holland 841. Framleiðandi: Sperry New Holland, Frakklandi. Innflytjandi: Glóbus h.f., Reykjavík.
YFIRLIT
Rúllubindivélin New Holland 841 var reynd af Bútæknideild Rannsóknastofnunar landbúnaðarins sumarið 1983. Með henni voru bundnir alls um 200 baggar.
Rúllubindivélin tekur grænfóður og hey á öllum þurrkstigum upp úr sláttuskárum eða múgum. Hún vefur fóðrið saman í þétta sívalningslaga rúllubagga. Baggarnir eru 1,2 m að breidd, en þvermál þeirra er breytilegt, allt að 1,68 m. Þyngd þeirra er að jafnaði 650-750 kg, sem samsvarar 480-550 kg/m3, og er þá miðað við nokkuð forþurrkað hey (rakastig 60-70%). Garnnotkun reyndist vera 53-75 m garns á bagga, en það nægir til að tryggja örugga bindingu, en ökumaður ræður hverju sinni hve þétt hann vefur um baggann. Afköst við bindingu voru að jafnaði 15-20 baggar/klst, sem samsvarar 11-13 tonn/klst (rakastig í heyi 60-70%). Bindivélin er nokkuð þung og þarf um 50 kW (68 hö) dráttarvél en tiltölulega lipur í notkun. Binding gekk oftast snurðulaust fyrir sig en nokkurn tíma tekur að ná leikni við rétta mötun í vélina. Væri hún fyrir hendi og heyið ekki mjög blautt voru baggarnir vel lagaðir. Ekki komu fram bilanir á fremur stuttum reynslutíma.
PÖTTINGER - sláttuþyrla
Skýrsla nr. 541
Gerð: Pöttinger TM165. Framleiðandi: A. Pöttinger OHG, Austurríki. Innflytjandi: Vélaborg hf, Reykjavík.
YFIRLIT
Sláttuþyrla Pöttinger TM165 var reynd af Bútæknideild Rannsóknastofnunar landbúnaðarins sumarið 1984 og notuð alls um 105 klst.
Sláttuþyrlan reyndist slá að mestu jafnt. Stubblengd í sláttufari mældist innan markanna 20-50 mm í um 75% tilvika við ökuhraðann 7-9 km/klst. Á illa sléttu landi voru aðeins brögð að því, að slátturhnífarnir særðu grasrót, en við allar algengar aðstæður fylgdi vélin vel ójöfnum landsins. Vinnslubreidd sláttuþyrlunnar er allt að 1,55 m og mældust afköst að jafnaði 0,8-1,0 ha/klst við venjulegar aðstæður og ökuhraðann 8-11 km/klst. Ætla verður 25-35 kW (34-47 hö) dráttarvél fyrir sláttuþyrluna. Vélin er lipur í notkun. Á reynslutímanum eyðilögðust lagerar er diskar undir sláttuskífum leika á, vegna þess að vatn komst í lagerhúsin. Stafaði það af rangri samsetningu frá framleiðanda. Öryggishlíf vélarinnar er fremur veikbyggð og lét fljótt á sjá. Að öðru leyti kom ekki fram óeðlilegt slit í sláttuþyrlunni á reynslutímanum.
MF - heybindivél
Skýrsla nr. 542
Gerð: MF228. Framleiðandi: Massey Ferguson Limited, England. Innflytjandi: Búnaðardeild SÍS, Reykjavík.
YFIRLIT
Heybindivélin M.F. 228 var prófuð af Bútæknideild Rannsóknastofnunar landbúnaðarins sumarið 1984. Alls voru bundnir rúmlega 17000 baggar með vélinni.
Heybindivélin tók heyið vel upp úr múgum og skildi eftir litla dreif. Hún batt heyið í vel mótaða bagga 0,46 m breiða og 0,36 m þykka. Lengd þeirra stillanleg, en þó vart nóg, og varð að gera lítilsháttar breytingar á stillibúnaði til þess að unnt væri að fá baggalengdinar niður fyrir 0,70 m. Nokkur breytileiki kom fram í lengd bagganna einkum þegar bundið var í kyrrstöðu. Þéttleiki bagganna er stillanlegur innan nokkuð víðra marka. Afköst við bindingu úr múgum voru að jafnaði 9-12 tonn/klst en gátu orðið mun meiri við bestu aðstæður. Vélin vann mjög örugglega og mishnýting nær engin. Á prófunartímanum losnuðu boltar sem halda aðaldrifhúsi með þeim afleiðingum að mötunargafflar skemmdust illa. Vélin reyndist í heild örugg í notkun og bilanir urðu ekki aðrar en að framan greinir.
KUHNFLEX – múgavél
Skýrsla nr. 543
Gerð: Kuhnflex KF4. Framleiðandi: Kuhn S. A. Saverne, Frakklandi. Innflytjandi: Búvéladeild SÍS, Reykjavík.
YFIRLIT
Múgavélin Kuhnflex KF 4 var reynd af Bútæknideild Rannsóknastofnunar landbúnaðarins sumarið 1984 og notuð alls um 80 klst.
Múgavélin reyndist raka vel og skilja eftir litla dreif við algengar aðstæður. Hún setti heyið í jafna og beina múga. Magn dreifa í rakstrarfari mældist að jafnaði á bilinu 25-75 kg þurrefni á hektara (0,3-0,9 hb/ha) við eðlilegan ökuhraða. Vélin reyndist fylgja fremur vel ójöfnum á yfirborði landsins. Hún er gjörn á að taka með sér steinvölur, sem kunna að vera í túninu, og setja í heymúgann. Múgavélin getur rakað frá skurðbökkum og girðingum, en traktor gengur í heyflekknum. Vindur hefur ekki veruleg áhrif á rakstrareiginleika vélarinnar. Breidd rakstrarfars vélarinnar er allt að 2,5 m. Ökuhraði við múgun reyndist hæfilegur 8-11 km/klst, og voru afköst að jafnaði á bilinu 1,7-2,2 ha/klst. Múgavélin reyndist lipur og auðveld í tengingu og notkun. Á reynslutímanum kom fram veileiki í bifteinum á tromlum og legubúnaði kefla er áfátt.
WILD – heyblásari
Skýrsla nr. 544
Gerð: Wild GB 55. Framleiðandi: Josef Wild & Co., Sviss. Innflytjandi: Búnaðardeild SÍS, Reykjavík.
YFIRLIT
Heyblásarinn Wild GB55 var reyndur af Bútæknideild Rannsóknastofnunar landbúnaðarins sumarið 1984. Var hann notaður við flutning á votheyi í rösklega 40 klst. Snúningshraði blásarans er 100 sn/mín (aflúttak 540 sn/mín). Blásarinn afkastar við þann snúningshraða 15-18 tonn/klst af votheyi, og er aflþörfin þá á bilinu 18-22 kW (25-30 hö). Loftmagnið sem blásarinn skilaði (rör opin) við 1100 sn/mín var um 3,9 m3/sek, en hámarksþrýstingur (Ps) við lokuð rör mældist um 206 mmVs. Blásarinn hvílir á tveimur litlum hjólum auk bita neðan á blásarahúsi. Þá fylgir blásaranum stöng með handfangi, og þá er hægt að flytja hann um skemmri veg með handafli. Á reynslutímanum bognuðu tveir hnífar er aðskotahlutur úr málmi barst inn í blásarann. Aðrar bilanir urðu ekki. Blásarinn er traustlega smíðaður.
RCW – kalkdreifari
Skýrsla nr. 545
Gerð: RCW - 3/No 11/0 - 2,5/. Framleiðandi: Agromet, Fabryka Maszyn Rolniczych, Brzeg, Póllandi. Innflytjandi: Vélaborg h.f. Reykjavík.
YFIRLIT
Kalkdreifarinn RCW-3/No 11 var reyndur af Bútæknideild Rannsóknastofnunar landbúnaðarins sumarið 1984 og notaður alls um 20 klst.
Kalkdreifarinn er þyrildreifari og hefur 2000 l í rúmmál. Við dreifingu á kalki (skeljasandi) var vinnslubreidd um 5 m, ef skörun dreififerða hæfileg. Við dreifingu á blöndu af áburðartegundum er vinnslubreiddin um 6 m. Eigi dreifing að vera viðunandi jöfn verður að skara dreififerðir af nákvæmni. Stilla má dreifimagn af viðhlítandi nákvæmni, með rennslishraða og síðan ökuhraða traktors. Við dreifingu á kalki (skeljasandi) eru dreifigæðin viðunandi, en við dreifingu á áburði eru þau ekki nægileg. Engar bilanir urðu á reynslutímanum og ekki varð vart óeðlilegs slits í dreifaranum.
HM - mykjudæla
Skýrsla nr. 546
Gerð: Laasby HM. Framleiðandi: Höjgaards Maskinfabrik A.S. Danmörku. Innflytjandi: Glóbus h.f., Reykjavík.
YFIRLIT
Laasby HM-mykjudælan var prófuð af Bútæknideild Rannsóknastofnunar landbúnaðarins veturinn 1984-1985 og notuð alls um 110 klst.
Dælan er ætluð til flutnings á þunnri mykju. Hún reyndist vel við flutning á þunnfljótandi mykju úr haughúsi í dreifara. Dælan hentar best í brunnhús á áburðarkjallara undir gripahúsi. Með henni má dæla upp úr allt að 4 m djúpum geymslum. Afköst dælunnar eru verulega háð þykkt mykjunnar. Flutningsgeta hennar reyndist vera yfir 5000 lítrar á mínútu við lágt þurrefnismagn mykjunnar. Aflþörf dælunnar við dælingu er allt að 35 kW (48 hö). Dælan hentar vel til þess að hræra upp í áburðargeymslum. Fastir aðskotahlutir geta stöðvað dæluna komist þeir í inntaksop hennar en valda yfirleitt ekki skemmdum. Bilanir urðu ekki á prófunartímanum.
KÁ – mykjudreifari
Skýrsla nr. 547
Gerð: KÁ mykjudreifari. Framleiðandi: Kaupfélag Árnesinga, Selfossi
YFIRLIT
KÁ-mykjudreifarinn var reyndur af Bútæknideild Rannsóknastofnunar landbúnaðarins veturinn 1984-1985 og notaður alls um 60 klst.
Dreifarinn er ætlaður til flutnings og dreifingar á þunnum búfjáráburði. Jafnleiki dreifingar reyndist nokkuð háður þykkt mykjunnar. Væri þurrefnisinnihald hennar meira en 8-8,5%, varð dreifingin ófullnægjandi og við 10% þurrefni kemur mykjan úr dreifirörinu í einni samfelldri bunu. Til þess að lækka þurrefnismagnið niður í fyrrgreint mark (8-8,5%) þarf auk þvagsins, 5-6 tonn af vatni á ári fyrir hvern grip í fjósi. Ætla verður 40-50 kW dráttarvél fyrir dreifarann.
Í lok prófunartímans brotnaði rörsplitti er heldur dæluspöðum á dæluöxli. Aðrar bilanir urðu ekki, og í heild virðist dreifarinn vera nægilega traustbyggður.
HAYMATIC – heyrakamælir
Skýrsla nr. 548
Gerð: Haymatic. Framleiðandi: Farmer Tronic ApS, Danmörku. Innflytjandi: Búnaðardeild SÍS, Reykjavík.
YFIRLIT
Haymatic-heyrakamælirinn kom til prófunar í lok septembermánaðar 1984. Hann er ætlaður til mælingar á rakastigi í þurrheyi og hálmi. Mælirinn var eingöngu reyndur við mælingar á heyi með mismunandi þurrefnisinnihald. Mælisvið hans er á bilinu 13-50% rakastig og er mælinákvæmni hans viðunandi á heyi með 15-30% þurrefni. Við mælingar verður að gæta þess að heyið liggi fast að mælinemanum og æskilegt er að taka 4-5 sýni úr sömu heystæðu. Við prófunina var könnuð fylgni á milli hefðbundinna þurrefnisákvarðana í þurrkskáp og Heymatic. Heyrakamælirinn er handhægur og lipur í notkun og hver þurrefnisákvörðun tekur 1-3 mínútur.
KRONE – heyþyrla
Skýrsla nr. 549
Gerð: Krone AM 201Z. Framleiðandi: Machienfabriken Bernard Krone, V-Þýskalandi. Innflytjandi: Hamar h/f., Reykjavík.
YFIRLIT
Sláttuþyrlan Krone AM 201Z með sambyggðum heyknosara var reynd af Bútæknideild Rannsóknastofnunar landbúnaðarins sumarið 1985 og notuð um 87 klst. Sláttur vélarinnar reyndist viðunandi góður við flest skilyrði. Breidd sláttuskára var allt að 2 m og mældust afköst að jafnaði 1,3-1,8 ha/klst við venjulegar aðstæður og ökuhraðann 8-11 km/klst. Hæfileg subblengd í sláttufari (20-50 mm) reyndist í um 50% tilvika. Vélin fylgir ójöfnum landsins allvel þrátt fyrir mikla vinnslubreidd. Gera verður ráð fyrir minnst 40 kW (54 hö) dráttarvél til að knýja vélina en til að ná hámarksafköstum þarf um 50 kW (68 hö). Á reynslutímanum brotnuðu tvær hnífafestingar og aftursláttaröryggi er ekki nægilega traustbyggt. Ekki kom fram óeðlilegt slit á sláttuþyrlunni. Heyknosari fylgir vélinni. Rífur hann og mer heyið við slátt og flýtir nokkuð fyrir þurrkun. Hægt er að aftengja knosarann en ef uppskera er mikil þá vill hann draga með sér heyið. Í flutningsstöðu er burðararmi sláttuskífanna lyft í lóðrétta stöðu með vökvaþrýstingi frá traktor. Hnífaslit var eðlilegt.
TAARUP – múgsaxari
Skýrsla nr. 550
Gerð: Taarup 106. Framleiðandi: Maskinfabriken Taarup A/S, Danmörku. Innflytjandi: Búnaðardeild SÍS, Reykjavík.
YFIRLIT
Taarup 106 múgsaxarinn var prófaður af Bútæknideild Rannsóknastofnunar landbúnaðarins sumarið 1985 og notaður alls um 76 klst.
Múgsaxarinn er ætlaður til söxunar á heyi og grænfóðri. Saxarinn er fremur margbrotið tæki að uppbyggingu, miðað við algeng landbúnaðartæki, sér í lagi drifbúnaðurinn. Tvennt ræður mestu um afköst saxarans, þ.e. þurrefnisinnihald heysins og skurðlengd. Hægt er að ráða hve fínt er saxað með því að breyta skurðlengdinni. Afköstin minnka með aukinni söxun, og sömuleiðis minnka við aukið þurrefnisinnihald. Við algengar aðstæður voru afköstin 13-15 tonn á klst. Söxun með múgasaxaranum er mikil og er það ótvíræður kostur við votheysgerð. Til samanburðar má geta þess að söxun hans, við grófustu stillingu er mun meiri en eftir fjölhnífavagn af algengri gerð en heldur minni en eftir sláttutætara. Við mestu söxun er heyið skorið mun meira en eftir sláttutætara. Múgsaxarinn er lipur í notkun, en hann er aflfrekur og verður að ætla fyrir hann minnst 50 kW dráttarvél. Á reynslutímanum brotnuðu 2 hnífar á blásturshjóli, en aðrar bilanir urðu ekki og reyndist múgsaxarinn í heild traustbyggður. |