|
|
Ríkt mólendi
Í ríku mólendi er uppskeran mun meiri en í rýru mólendi, vegna aukinnar hlutdeildar vinsælla beitarplantna (grasa og blómplantna) í gróðurþekjunni. Jarðvegur er yfirleitt þykkur og yfirborðið oftast þýft.
Ríkt mólendi er mjög fjölbreytilegt hvað gróðursamsetningu varðar. Þar eru ýmsir smárunnar (blá- og aðalbláberjalyng, beitilyng og fjalldrapi) oft áberandi, sem og víðir. Alltaf er talsvert af grösum og oftast nokkur mosi í sverði.
Oft kann að reynast erfitt að meta mörkin á milli ríks og rýrs mólendis, en eins og nafngiftirnar fela í sér þá er ríka mólendið gróskumeira.
Til að skera úr um það hvorum flokknum ákveðið svæði tilheyrir er leitað eftir tegundum sem beitardýr eru sólgin í s.s. grösum, blómplöntum, störum (stinnastör, gulstör) og víði. Séu þessar tegundir áberandi er landið flokkað sem ríkt mólendi. Einnig er hugað að hlutdeild mosa, en minna er af mosa í ríku mólendi en rýru, þó hann finnist oft á þúfnakollum í ríku mólendi.
Mörkin milli þess hvað flokka skuli sem ríkt mólendi annarsvegar og kjarrlendis hinsvegar kunna í sumum tilvikum að vera óljós. Þeki hnéhátt kjarr um og yfir 50% yfirborðsins flokkast svæðið sem kjarrlendi, en að öðrum kost sem ríkt mólendi.
Rétt er að hafa það í huga að beit getur valdið því að einkennisplöntur í ríku mólendi verða lítt áberandi við fyrstu sýn.
|
|
|