|
|
Tilraunastöðin að Korpu
 Jarðræktarsvið RALA hefur til umráða tilraunastöðina á Korpu. Þar er um að ræða 18 hektara landspildu úr jörðinni Korpúlfsstöðum í Mosfellssveit með tilheyrandi byggingum. Vor og sumar er Korpa helsti vinnustaður starfsfólks á jarðræktarsviði.
Í Korpulandi er að finna jarðveg af mörgum gerðum og þannig er það mjög hentugt til jarðræktartilrauna. Framræst mýri er að vísu fyrirferðarmest í landinu, en þar má líka finna mólendi og mel með mismikilli moldaríblöndun.
Ekki er allt Korpuland í notkun í einu. Hluti þess er tún og bíður þess að þörf verði fyrir það til tilrauna. Á ári hverju eru plægðir 3-4 hektarar og í þá er sáð til einærra tilrauna og nýrra fjölærra tilrauna. Túnræktartilraunir standa flestar í 4-5 ár.
Stærsta rannsóknarverkefnið á Korpu síðastliðin ár hefur fjallað um hagnýtingu belgjurta. Þar er bæði átt við belgjurtir til fóðurframleiðslu og til uppgræðslu. Margar tegundir koma við sögu, en mest hefur verið átt við rauðsmára, hvítsmára og lúpínu.
Belgjurtir má kalla áburðarverksmiðjur náttúrunnar. Í samlífi við rótargerla framleiða þær þau nitursambönd, sem þær þurfa til vaxtar og þroska. Mikill áhugi var á ræktun belgjurta til fóðurs og jarðvegsbóta framan af öldinni, en sá áhugi hjaðnaði þegar tilbúinn áburður varð ódýr og auðfenginn upp úr öldinni miðri. Nú er áhugi á belgjurtum endurvakinn, því að menn eru teknir að óttast ofnotkun tilbúins áburðar með tilheyrandi útskolun og mengun grunnvatns. Belgjurtir eru þar að auki ómissandi í lífrænni ræktun.
Annað stórt verkefni á Korpu er kornrækt. Þar er bæði um að ræða kynbætur og ýmsar ræktunartilraunir. Með kynbótum er reynt að laga bygg að íslensku veðurfari. Í samanburði við veðráttu í grannlöndunum er sumarið hér svalt en nokkuð langt og haustið er stormasamt. Árangur kynbótanna má teljast bærilegur og fram eru komin byggyrki, sem bæði eru fljótþroska og vindþolin. Kornræktin setur svip á Korpuland, einkum síðsumars og á haustin. Gulhvítar kornspildur blasa þá við vegfarendum á Vesturlandsvegi undir Úlfarsfelli.
Atvinnudeild Háskólans, en hún var forveri RALA, fékk Korpuland til ráðstöfunar árið 1960. Þá þegar var hafist handa við ræsa fram land og reisa nauðsynlegustu byggingar. Fyrir þann tíma höfðu tilraunir verið gerðar á Varmá í Mosfellssveit. Umhverfi tilraunastöðvarinnar hefur tekið miklum breytingum síðustu 40 ár. Þá var Korpa langt uppi í sveit, en nú er þess skammt að bíða að byggðin umlyki hana.
Tilraunastjóri er Jónatan Hermansson
|
|
|