Gróðurflokkur er hér notað sem hugtak yfir gróðursamfélög sem hafa sérstaka eiginleika með tilliti til beitar, uppskeru og samsetningar gróðursamfélagsins. Séu skilgreiningar á gróðurflokkum rúmar geta mörg gróðursamfélög flokkast undir einn gróðurflokk. Hver gróðurflokkur fyrir sig hefur sameiginlega gróðurþætti. Þetta eru þættir sem ákvarða eiginleika hvers svæðis: uppskera, gróðurhula og tegundir.

Við mat á landi er gróðurflokkur tiltekins skika (landeiningar, „polygon“) ákvarðaður. Gróðurflokkar eru ákvarðaðir með mati á vettvangi eða í tölvu, en ekki eru gerðar mælingar á uppskeru eða útbreiðslu einstakra tegunda.

Við skiptingu lands í gróðurflokka er jafnframt miðað við að unnt sé að greina landið með aðstoð gervihnattamynda. Slíkar myndir eru samsettar úr mörgum stafrænum myndum af mismunandi sviðum litrófsins (bylgjulengdum). Sumir nemar gervihnattanna eru einkum ætlaðir til þess að greina á milli gróðurs og þá sérstaklega þeir sem nema innrauða geislun, því þeir skynja í raun magn blaðgrænu á yfirborði jarðar. Með úrvinnslu á gervihnattamyndum (stafrænni myndgreiningu) má greina á milli gróðurflokka á mjög hagkvæman hátt og þessari aðferð er beitt víða um heim við kortlagningu á gróðri. Nánari grein er gerð fyrir úrvinnslu gervihnattamynda annars staðar í þessari greinargerð.

Segja má að flokkunin taki mið af framleiðni gróðurs (blaðgrænu) sem aftur á móti hefur mikið gildi fyrir mat á landi til beitar. Nytjalandshópurinn hefur þegar þróað aðferðir (frumdrög) til að greina á milli þeirra gróðurflokka sem hér eru tilgreindir.

Miðað er við 10 gróðurflokka. Þeir eru ræktað land, kjarr- og skóglendi, graslendi, votlendi, hálfdeigja, ríkt mólendi, rýrt mólendi, mosavaxið land, háfgróið land og lítt gróið land. Vatn og snjór flokkast sérstaklega.