Nytjaland - Jarðabók Íslands

Eldri fréttir

Fréttir Júní. 2003 prufa Undanfarnar vikur og mánuði hafa Fanney Gísladóttir og Björn Traustason haldið landamerkjafundi með landeigendum þar sem landamerki bújarða á Austurlandi hafa verið skráð. Vettvangsferðirnar eru orðnar fimm talsins og í þeim hafa verið heimsótt alls 14 sveitarfélög í Suður- og Norður-Múlasýslu og ef gamla hreppaskiptinging er viðhöfð er fjöldinn 24. Dagana 24.-28. mars héldu þau fundi í Djúpavogshreppi, Breiðdalshreppi, Stöðvarhreppi, Fáskrúðsfirði og Seyðisfirði. Austur-Hérað var tekið fyrir 7.-9. apríl og Fellahreppur þann 10. Dagana 28. og 29. apríl voru haldnir fundir í Fjarðarbyggð, en 30. apríl og 1. maí á Vopnafirði. Í fjórðu ferðinni 2. til 6. júní var fundað í Norður-Héraði, á Borgarfirði eystri og í Mjóafirði. Í fimmtu og síðustu ferðinni 24. júní héldu Fanney og Björn fund í Fljótsdalshreppi. Fundirnir hafa gengið mjög vel og hefur mæting verið góð í flestum tilvikum. Ekki er búið að taka saman nákvæman fjölda jarða sem skráður var í þessum ferðum, en þær eru rúmlega 700. Við þökkum öllum þeim sem lagt hafa hönd á plóginn og vonum að afraksturinn eigi eftir að nýtast áðurnefndum sveitarfélögum og landeigendum. Apríl. 2003 Þann 29. apríl var undirritaður samstarfssamningur Fasteignamats ríkisins og Rannsóknastofnunar landbúnaðarins, fyrir hönd verkefnisins Nytjalands. Með þessum samningi skuldbinda báðir aðilar sig til að veita gagnkvæman aðgang að upplýsingum sem nýtast við starf þeirra. Jafnframt styrkir Fasteignamat ríkisins Nytjaland með þriggja milljóna kr. framlagi, sem er afar mikilvægt fyrir rekstur verkefnisins á þessu ári. Samstarfssamningurinn er í samræmi við þá stefnu að auðvelda upplýsingastreymi á milli stofnana ríkisins og til almennings. Fasteignamat ríkisins hýsir Landskrá fasteigna sem gegnir því hlutverki að vera ein sameiginleg skrá, miðlægur gagnagrunnur, yfir allar fasteignir á landinu fyrir öll stjórnvöld. Hún er grundvöllur skráningar fasteigna og hnitsettra eignamarka lands, mats fasteigna, auk þess að vera stoðgagn í landfræðilegum upplýsingakerfum. Báðir aðilar munu hafa mikið gagn af þessu samstarfi. Fasteignamatið lætur í té upplýsingar úr Landskrá fasteigna, sem eru nauðsynleg grunneining í gagnagrunni Nytjalands, ásamt upplýsingum um eignarhald o.fl. Jafnframt mun Fasteignamatið fá viðamestu landfræðilegu gögnin sem nú eru til um jarðamörk á Íslandi og um gróður á þessum jörðum. Grunnur Nytjalands hefur ekki lagalegt gildi og hann inniheldur ekki þinglýst eignarmörk. En hann auðveldar mjög að koma skipulagi á slíkum gögnum til nútímalegs horfs, þ.e. hið mikla starf að hnitsetja þinglýst jarðamörk á Íslandi og að gera slík gögn aðgengileg, m.a vegna eignaumsýslu. Jafnframt gjörbreytir grunnurinn aðstöðu til skipulags og mótun landnýtingar í dreifbýli á Íslandi.