|
|
Hálfdeigja
Í þennan flokk falla gróðurlendin hálfdeigja, jaðar og framræst votlendi sem ekki er farið að bera augljós merki gróðurbreytinga yfir í þurrlendi (valllendi eða mólendi).
Hálfdeigja einkennist af tegundum sem ýmist eru komnar úr votlendi eða af þurrlendi. Einkennistegundir eru starir, s.s. hrossanál, mýrarstör og slíðrastör, elftingar, t.d mýrarelfting og klóelfting. Aðrar algengar tegundir eru hálíngresi, snarrótarpunktur, túnvingull, vallhæra og smárunnar. Í hálfdeigju vex einnig oft víðir og stundum birkikjarr.
Við fyrstu sýn er auðvelt að þekkja hálfdeigju á fífunni sem er mjög áberandi í hálfdeigju um mitt sumar. Fífan er þó einnig algeng í votlendi og því þarf að ganga úr skugga um það hvort þessir fífuflákar tilheyri votlendi fremur en hálfdeigju.
Jarðvegur hálfdeigju er ætíð rakur en þó stendur vatn sjaldnast upp undir grasrót. Samt getur vatn staðið í lautum á vorin og eftir mikla úrkomu.
Hálfdeigja er oft þýfð og á mörkum votlendis og vallendis eða móa, (þ.e. jaðar) myndast einskonar þúfnagarður, einkum þar sem þurrlendið liggur nokkuð hærra en votlendið, eins og títt er í holtum og við hæðardrög.
|
|
|